Ancîya bê hêvîye verdayîme

 

Lerzan JANDİL

Sere herdan de keso ke hêna maya xo ra nêbîyo, ya kî merdo, bê xeta wo. Xêca nê her di kesan, yanê pito ke hêna zereyê maya xo de ro, ya kî mordemo ke merdo, her kes xeta keno, şaşîye keno. Seba naye kî qet kes nêşîkîno îda bikero, ke o bê xeta wo. Her kes bi xeta wo. Lê mordem tenya şîkîno bivajo, xetaya qije ya kî xetaya girse.

Eke mordem biwazo pîya biciwîyo, gere mordem nê xetayan û şaşîyan girs mekero, nê xetayan dêm medêro ju hetî ser. Lê eke mordem seba armancanên şîrigan, seba jutîya ju şarî kewto raye û seba naye polîtîka keno gere o taw na derheq de tayêna dîqet bikero.

Çike seba cîya vindetene, ju nêbîyene sebebî zaf ê. Marîfet her çiqas ke nê xetayî û şaşîyî est ê kî, jutîye viraştena. Tawo ke mordem parçe bîyena şarê ma ser ro fikirîno, nê raştîyan tayêna eşkera vîneno.

Mi derheqê jutîya şarê ma de nivisê xo yê di hefteyan ra ver de nivisna bî:

“Heto bîn de, yanê hetê Kurdan de raya verêne ju îtîfaq virazîya û kes qalê boykotî nêkeno. Nê her di gamî kî gamên dîrokkî yê. Kaleka naye de na gama îtîfaqî ser de kî gamêde fîraz a. Raya verêna panc partîyên Kurdan amayî tê lewe, 2. Gulane de ju îtîfaqê weçînitişî viraşt. Şopêna: na game gamêde fîraz a. Partîya juye qij a, juye girs a, juye na wa, juye a wa. Qet problem nîyo. Xora rindîye, weşîye, marîfet kî o wo, ke nê partîyên nîya cîya cîya, qij girs amê tê lewe, seba heqanê xo yên şîrigan pîya kunê weçînitiş.

Her çî ra ver gere no îtîfaq bêro zixm kerdene, seba ke tenya seba nê weçînitişî mebo, bêro xebetîyene. Yanê no îtîfaq tenya seba weçînitişî mebo, seba vereroje bibo mîsalêde balkêş, bibo sîmbolê jutîye. Seba naye kî gere her partîye hem hetê xo ra dest bierzo karê weçînitişî, şarî mobîlîze bikero, hem nê îtîfaqî bikero bingeyin, hem kî nê îtîfaqî şarî re bikero mal. Wa no îtîfaq hem mezgê partîyanên Kurdan de hem kî mezgê şarê ma de binîşo ro. Wa hênî bo, ke her reng ra, her bawerîye ra, her îdeolojî ra şarê ma bişîkîyo, bê ters, bê şupe mîyanê nê îtîfaqî de cayê xo bigêro.“

Lê 17ê Gulana 2108î de yanê 15 rojî ra dime nê panc partîyî, Partîya Demokratîk Kurdîstan-Tirkîye), Platformê Demokratanên Kurdîstanî (KDP), Înîsîyatîvê AZADÎYE, Partîya Sosîyalîsta Kurdîstanî (PSK), Partîya Azadîya Kurdîstanî (PAK) rêyêna amayê tê lewe û nameyê nê partîyan serekê Partîya Azadîya Kurdîstanî (PAK) Mustafa Özçelîkî da eşkera kerdene:

“Hêna ke Partîya Demokratîke yê Şaran PDŞ/HDP de prînsîpanên organîze kerdişê weçînitişî de pîya xebetîyene, jubînî dîyenan dewam kerdêne, roja 13ê Gulane ma rê xeberê amê, ke PDŞye roja bîne haydarîya xo ya weçînitişî kena eşkera. No tewir dûştê ruhê jubînî dîyenanên îtîfaqî de bî û gamêde nê dîyenan çîne qebul kerdene bîye. Ma, ancîya seba ke bingeyê îtîfaqî bişeveknîme zê îtîfaqê weçînitişê “Kurdîstankî” zaf cad kerd, ke wa deklarasîyonê îtîfaqê weçînitişê Kurdîstanî gorê prînsîpanên ke ma tede kerdî bî tê sare, wa re haydarîya weçînitişî yê PDŞye bêro ulame kerdene. PDŞye beşo tewr muhîm yê jubînî dîyenanên ma yê mutabaqatî, prînsîpên ke ma tede kewtîme mutabaqat çîne hesabnayî û 14ê Gulane de haydarîya weçînitişî kerde eşkera. Haydarîya weçînitişî yê PDŞye û haydarîya weçînitişî yê Serekkomarî hênî amê amade kerdene, ke deklarasîyonê îtîfaqê weçînitişî -teba heyetê PDŞ amê bî qebul kerdene- zê çîne hesabno. Her çiqas ke ma zaf cad kerd kî, çi hêf ke, seba îtîfaqê weçînitişî jubînî dîyenî nêrestî armancanên xo…”

Hemserekê PDŞye yê wîlayetî Şerîf Camci kî dûştê naye de nîya vat: “Qaso ke ma bîme şahadê jubînî dîyenan PDŞye sere ra zaf qedir dêne nê xebatî. Ma bi nêzdî bîyena stratejîke hereket kerdêne, temayanên teknîkan ra dotêrî nîya dêne. Ez fikirîna, ke PDŞye re neheqîye ama kerdene. Nê eşkera kerdişî haydarîya hîsîye vînenîme. Ma nêşîkînîme tenya bi nê weçînitişî fikirîyene hereket bikerîme. Kêmasîye ke est a, ê ma pêroyin a. Her kes gere kêmasîya xo qebul bikero. Ez şîkîna bivajî, ke nê eşkerakerdişê kêmî bê însaf ê. PDŞ talebanên zaf şaran hewênena. Gere na bêro dîyene û hênî bêro hereket kerdene. Ma deklare kerd bî, ke qadê fikirî de cudatîye çîn a. Problemî cayanên bînan de rê, gere seba pêroyine çareserîye bêro dîyene.”

Nika ez se bivajî! Ma vajîme PDŞye xeta kerde, gere partîyanên bînan kî xeta bikerdêne. Ya kî ma vajîme, partîyanên bînan xeta kerde gere PDŞye kî xeta bikerdêne?

Na rehetîye, demî ne şinasnayene, na xo mîyanê her çî de dîyene, na dûştê waştenanên şarî de vindetene, na xo serîya bê verpersîyarîye hetanî kotî?

Şarê bê sebir jutîya şarê ma ser ro vindeto. Gere her hetî kîsê xo ra fedakarîye bikerdêne, no îtîfaq biviraştêne.

Na derheq de baro giran doşanê PDŞye ser ro ro. Gere PDŞye her partîye de bingeyê prînsîpanê şarkî de bêro tê lewe. Şima, partîyî pêro mîyanê Kurdan û koledaran de haştîye, dîyalog wazenê, lê kurdan mîyan de çîyanên qijan ser ro nênê tê lewe. No senê mantiq o. O taw kam re şima bawer keno, ke şima haştîye û dîyalog wazenê.

Ma çi taw vengê xo kenîme berz vanîme: Êndî beso! No senê qeyde û senê prînsîp ê, no senê kay o?

Mesela est ya kî çîne bîyena şarê man a. Partîye ma çinayî de ênê şonê. Nînan ma ancîya bê hêvîye verdayîme.