Dimilîyê Rojawanî - AZAD ARARAT

24 Nisan 2018 Salı

AZAD ARARAT

Ez ge-ge Rojawanê Kurdîstanî ra gêrena. Wexto ke gêrena rastê tay çîyanê ecêban yena. Nînan ra yew zî çend rojî verê bî.
Rojê seba karê xo ez şîya Bozanî. Bozanî bi erebkî Eyn Îsa yo. Mana xo Çimê Îsayî yo. Bozanî nameyê kan yê şarçe yo. Labelê erebê şowenîstî name vurnayo û kerdo Eyn Îsa. Eyn îsa de Desteya Çandê esta. Ez şîya uca. Ma halê yewbînî pers kerd. Baş o ke girweyê her kesî hol ravêreno. Labelê awankerdişê sîstemî hîna zî dewam keno. Hetêke ra sîstem ronîyayo la heto bîn ra zî hîna yeno awankerdene. Xora sîstemê demokratîke wina yo, hertim mîyanê vurnayîşî de yo.
Şarê tîya qehwe ra zaf hes kenî. Ma zî qehweyê xo şimenê û tereqnenê. Qisa gêraye ameye kurd û kurmancîye ser. Mi nêşa xo û vat ‘Ez Dimilî ya’. Yew kênaya ezebe ke destê xo şanabî alişkê xo, xo rast kerd û vat ‘ez zî Dimilî ya’. Ecêb! Senî beno? Bozanî û Dimilî, çi eleqa?
Mi pers kerd, kêneka ezebe cewab daye.
Wextê serewedaritişê Şêx Seîdî de, Vakurê Kurdîstanî ra yenê Kobanî. Çi heyf ke aye nêzanayêne kamcîn herême ra ameyê. Pîlê aye merdibî û aye zî nêzanayêne. Nînan çend birayê yenê Kobanî. Badê çend serran Kobanî ra bar kenê şinê Reqqa. Uca de manenê û vîst serrî verê zî Reqqa ra yenê Bozanîya kurdî yanî Eyn Îsa, yanî Çimê Îsayî.
Heta nika qandê ke mi pers kerdo Bozanî, Kobanî û Serê Kanîye de Dimilîyî estê. Nê hetê Sêwregi ra ameyê. Êyê Bozanî û yê Kobanî ziwanê xo xo vîra kerdo. Êyê ke Serê Kanîye de cuyenê, ziwanê xo xo vîra nêkerdo. Hîna zî ziwanê xo ya qisey kenê. Labelê qijê ke benê pîl ziwanê xo nêzanê. Eke pîlê nika bimirê Serê Kanîye de zî keso ke Dimilkî qisey bikero, nêmaneno.
Bi hezaran serrî ver bi cêr û corê Dîcle û Feratî de koçerî ameyo kerdene. No wina heta da-pancas serrî verê dewam kerdo. Koçerîye eşîret bi eşîret bî. Koçerî her cayê ke şîyêne de kultur û ziwanê xo pawitênê. Beno ke bawerîye ameyêne vurnayene. Labelê qirkerdişê kulturî goreyê nika tay bî.
Nika koçerîye ver bi Ewropa bena. Kultur û ziwan ra durkewtiş zî hema vaje qetî yo. Zeman her ke ravêreno, teknolojî raver keweno, asîmîlasyon zî beno vêşî. Sîstem yew rengî û yew ziwanî ferz keno. Sîstemê Rojawanê Kurdîstanî de her kesê ke biwazê şenê bi ziwanê xo ya perwerde bivînî. Çi heyf ke dimilîyê Rojawanî no het de wayîrê zanayîşî nîyê. Qet cehd nêkenê ke ziwanê xo bimusnê domananê xo. No yew problemo cidî yo. Seke Vakurê Kurdîstanî de zî yeno dîyene. Dimilî yan zî kirmancî ganî yew hişo newe raver berê û ziwanê xo xo vîra mekerê. Çunke lehçeya Kirmanckî bingehê lehçeyanê Kurdî ya. Eke bêro vindîkerdiş seba heme lehçeyanê Kurdî hol nêbeno. Dimilîyê ke hişê kurdan yê esasî yê, eke bêrê xo ser hetê zanist û kulturî ra heme kurdî do raver şirê. Dimilîyan reyde heme kurdî do çîyanê başan bîyarê raste. Kokê tewr kan yê kurdan wexto ke newe ra kewe bibo, bêgûman gilê ci bihêz û rindek benê. Fêkîyê ci zi bi tahm benê.

YENİ ÖZGÜR POLİTİKA

YENİ ÖZGÜR POLİTİKA

Bu Blogda Ara

Dimilîyê Rojawanî - AZAD ARARAT

AZAD ARARAT

Yorumlar

Yorum Gönder