Ameye bi vîrêko bihêz mumkin o

28 Nisan 2018 Cumartesi

FATMA ADIR

Roja ma ya ewroyî de rewşa ke tewr zaf merdimî tersnena a ya ke ma ver bi komelêko bêhiş şonî. Cuya ma de her ke şono tarz û şekilê fikirîyayîşê rojane û populîstî beno hakim û no zî tehlukeyo tewr gird o. Ewro hewl dîyeno neslêko bêhiş, bêkultur û bêkok bêro xelqkerdiş. Ma ewro merdimo bêhiş ke tena çîyê ke vernîya ey de estî ra razî yo reyde têrî yî. Yan zî ma ferqê sîstemo ke nêwazeno ma haya raştîya xo de bibî de nîyî. Merdim eşkeno vajo na polîtîka bi hawayo zanaye yena averberdiş.
Çîyê populîst û rojane ke bi hawayo zaf lez bedilîyenî, wina kenî ke ma çîyê ke vizêr cuyayî xo vîra bikerî. Ewro cuya rojane ke ma bi hawayo çimvêşanîye hewl danî biresî ci, raştîya xo de xapîyayîşêko gird o û ma ferqê ci de nîyî. Ma kam î, çi yî û çira cuyenî? Ma amancê cuye û no het de bedelê ke ameyî dayîş, zaf rew xo vîra kenî. Ma vîrardişanê şêrîn û dejinan xo vîra kenî. Wexto ke ma tarîx de tayê apey şonî, hişê ma ma ra vano se? Ma hîna nêşênî vajî ‘gelo hişê ma çi ano ma vîr’ û ma kewenî lezê rojaneyî mîyan.
Belê, nê rojan ra yewe de zî qirkerdişêk amebi cuyayîş. Zafaneyê neslê ciwanî qirbîyayîşê armenîyan nêzanî yan zî propogandaya nîjadperestîya Tirkî ser ra musayî. Ya, 24ê Nîsane serrgêra qirkerdişo ke şarê armenî ser o ame kerdiş o.
Her serre tayê kesê ke qirbîyayîşê armenîyan protesto kenî û mesajanê destekdayîşî danî, estî. Labelê ma her serre benî şahid ke tayê hetî bi polîtîkayanê xo nê dejan goreyê menfîetanê xo yê sîyasîyan xebetnenî. Nê polîtîkayê ke her serre dibare benî, raştîya xo de ser dejan ra qezençkerdişê menfîetî yo. Na rewşe her serre dibare bena. Heta ke vera na rewşe de vindetişêko cîddî nêro nîşandayîş, ser dejan ra domnayîşê polîtîkayan, sey rewşêka normale yena dîyayîş. Vîrînêkerdiş bi hawayo samîmî nizdîbîyayîş û wayîrvejîyayîş o.
Par nê wextan de dewleta tirkî hêrişê Qereçoxî yê Rojawanî kerdbî. Yê ke Qereçox xo vîra kerdî, demêk ra pey banderê dagîrkerîya Efrînî zî benî. Seke yeno zanayîş, şewa 24ê Nîsane teyarayê dewleta tirkî Qereçox û Şengal ser o bombe varnayî û netîceyê hêrişan de 18 endamê YPG û YPJyî şehîd kewtbî. No tarîx seba ke tarîxê qirkerdişî bidî vîrê kurdan, bi hawayo zanaye amebi weçînayîş. Eynî wext de netîceyê hêrişêko bîn de Helîn Murate, Nalîn Muşe û Şervîn Mardîne şehîd kewtbî. Reyna eynî rojan de vera Botanî de operasyonêko hîra dîyabi destpêkerdiş û netîceyê operasyonî de Nudeme (Turkan Yuksele) şehîd kewtbî. Peynîya aşma nîsane de zî embaze Nujîn Anqara şehîd kewtbî. Embaz Bedran Gundikremoyî eynî rojan de bîybî hedefê teyarayanê dewleta tirkî.
Şehîdgehê ke bi hezaran ciwanê kurdî tede rakewenî zî eynî rojan de bîybî hedefê dewleta tirkî û ameybî bombekerdiş. Hewl dîya bi bombekerdişê nê şehîdgehan şarê kurd, bêhiş biverdî. Çimkî dewleta tirk û îdarekarê ci baş zanî ke şar û cinîyî şehîdanê xo xo vîra nêkenî. Şar û cinîyî her serre sey îbadetî şehîdanê xo xo vîr anî û mezelanê înan zîyaret kenî. Seba şarê kurdî her şehîd û şehîdgehî benî zîyar û îbadetxane û sey pîrozî yenî qebulkerdiş.
Yê ke bi têkoşînê azadîye, hewl danî ameyeyêk awan bikerî, nêyî bi hişê komelkî û manewîyatî pê anî. Yê ke seba azadîye canê xo feda kenî, benî hişê şar, cinî û yê merdimîye. Hişê kulturî û komelkî yê şarêkî wina aver şono. Tarîx wina yeno nuştiş. Bi no hawa çîyê ke hetê kesê ke nê hişî awan kenî ra yenî xelqkerdiş, mîyanê rojevanê rojaneyan de vînî nêbenî. Ganî ma nêkewî pey çîyanê rojaneyan û destûr nêdî ke nê çîyî rojaneyî ma komelêko bêhiş bikerî. Ganî hişê ma hemra û pîrozîyanê ma bi hawayo bihêz qeyd bikero ke ma qet xo vîra nêkerî…

33
YENİ ÖZGÜR POLİTİKA

YENİ ÖZGÜR POLİTİKA

Bu Blogda Ara

Ameye bi vîrêko bihêz mumkin o - FATMA ADIR

FATMA ADIR

Yorumlar

Yorum Gönder